50 Random Facts About Me

السلام عليكم و رحمة الله

كيف الحال ؟
اتمنى إنكم سعيدين =))

انتشر قبل فترة تاق الخمسين حقيقة العشوائية عن نفسي
و شفت فيديوهات واجد ع اليوتيوب مسويته
و قلت بسويه على مستوى التدوين و بحثت و شفت ناس واجد كاتبة تدوينات بهالتاق

و قلت ليش ما أسويه !!
و ع أساس كنت بكتبه بالإنجليزي بس الأخير غيرت رايي
و فضَلت إني أكتبه بالعربي

و عقب ما أخلص كتابة الخمسين حقيقة > واجد !
أروحي أسوي تاق لعدة أشخاص و هم بدورهم رح يكتبوا خمسين حقيقة عن أنفسهم

كل شي تمام؟
أجل يللا استعدوا للخمسين حقيقة !

1-  أنا فتاة “عسماوية” ما يعني إنني أستخدم يدي اليسار في الكتابة و أغلب الأشياء
2- أعشق القراءة حد النوم !

3- جداً صصعبة في التسوق ! مستحيل أرضى بأي شي بسهولة
4- دائماً أتمنى إني أشتغل بمكتبة ❤
5- أحب أشتري مناكير بس قليلاً ما أحطهم
6- لا أحب أيا من المشروبات الساخنة ما عدا الحليب
7- ما أعرف أسوي بالون بالعلك
8- أحب أنسدح ع رجل أحد و هو يحوس بشعري ! أدوخ ع طول
9- جداً سيئة في الرد ع الرسائل، و أحياناً أنسى أرد
10- ما أقدر أطول أظافري أبداً ، كل مره أقرر إني بطولهم تجيني حكه و أقصهم ع الأخير، واجد لما يشوفوا أظافري يقولوا ارحمي حالك !

11- ما أحب أتكلم ع التليفون كثير ، أفضل المحادثات وجهاً لوجه
12- مرت علي سنة انفجرت فيها قريحتي الشعرية و كتبت شعر واجد ، حالياً أكتب مرة كل ستة أشهر !
13- شاركت في مسابقة المساجلة الشعرية في سايتك و وصلت إلى آخر مرحلة “على مستوى الشرقية”
14- فتحت مشروع صغير و هو الرسم ع التيشرتات و امتد لسنة كاملة و توقفت عنه *أفكر أرجع له !
15- مرت علي فترة صرت فيها فيجتريان و هذا يعني إني صرت كائن لا يأكل اللحوم
16- أحب أنشد و أغرد بشكل مو طبيعي 
17- أتمنى دائما أن يكون عندي عندي ستديو خاص فيني
18- عندي قائمة بما يقارب الـ 100 شي و أتمنى أحققهم كلهم
19- أخاف جداً من فكرة أن أحد الأشخاص اللي أحبهم يموت ! و خصوصاً لما أكون بعيده عنه
20- لم أمارس الطبخ فعلياً إلا حينما تزوجت و حالياً أقيَم نفسي سبعة من عشرة 😛

21- ما أبي أسمي أحد عيالي بإسم فيه حرف الغين عشان ما يتعقدون إذا أحد قال لهم مثلاً قادة بدل غادة *فيني الصيحة
22- أحب أسوي جداول و أمشي عليها > وهذا شي أكيد عرفتوه من التدوينة السابقة
23- سابقاً كنت أشرب مشروب غازي مرة في الأسبوع ، حالياً أنا في مقاطعة للمشروبات الغازية مدى الحياة لضررها !
24- أحب الفن بكل أنواعه
25- أمارس الرياضة ست مرات ع الأقل في الأسبوع و أتمنى إني استمر على هالنظام مدى الحياة
26- تعلمت ركوب الدراجة في بيت عمي و تعلمت استعمال المكابح علي يد زوجي
27- أحب المطر و ريحته و ريحة الأرض بعد المطر و أحب أنام على صوت المطر و أحب كل شي في المطر
28- صعبة جداً في الأكل ، موب أي شي يعجبني و أكلات واجد ما أحبها بس الغربة خلتني أتغير و آكل هريس!
29- تعرضت لحادث مروري أنا و أختي في رمضان قبل ست سنوات تقريباً
30- أنا الوسطى بين أهلي

31- جربت السوشي بتشجيع من إحدى الصديقات، ما عجبني
32- لما كنت صغيرة ، فوق الدولاب هو مكاني السري و المعمل حقي و كل شي و كل يوم يشوفني أبوي يعصب علي عشان أنزل بس ما طاوعته إلا لما طحت من فوق لين تحت !!
33- شفت أفلام رعب بس مافي فلم أثر علي مثل تشاكي، أحياناً بالليل إذا صارت لحالي أتخيله بالحمام و إلا تحت السرير، يمكن هالرعب عشاني شفت الفلم و أنا مررره صغيرة و للحين ما أفكر اشوفه مره ثانية عشان استوعبه
34- أنا انسانة تنافسسسية و أحب المسابقات و دائماً أبي أفوز، أذكر مرة كان مسوين مسابقة بالكلاس و الطلاب مستغربين مني أنا ووحدة من البنات عسان حماسنا وقالوا لنا ترى مافيه هديه ! يعني ما يصير نتحمس و نحب المسابقات حتى بدون هدية !! بس لما ألعب مع زوجي بالبلاي ستيشن أوصل لمرحلة إنه موب لازم أفوز أصلا أهم شي اني استمتع باللعب 😀
35- أحب السوبر ماركت و أحب أروح هناك و أتسوق للبيت
36- أحب الألوان كلها و خصوصاً الأبيض
37- شفت تايتنك قبل سنة و نص بسس و ما بكيت لما شفته ! < ما عندي مشاعر! معليه
38- ما أحب الشطة و لا أحب ريحتها
39- قبل 8 شهور تقريباً كنت مصره إني أدرس علاج طبيعي كَتخصص
40- جاني العنقز أو جدري الماء و أنا بالروضة و نقلت العدوى لأختي الصغيرة و كانت أختي اللي أكبر مني ترسم وجه و عليه حبوب و تكتب فوق الرسمه اسمي و دائما ينتهي الموضوع و أنا أصيح بحضن أمي

41- لما أخاف، أتوتر، أحاتي أو بطلع عند جمهور .. بطني يعورني !
42- ما أحب ريحة الزقاير أو بالأحرى أكرهها، لما أمر عند أحد يدخن أكتم نفسي لين ما أعديهم و أتنفس، و ما أتخيل حياة الوحدة لما يكون أبوها أو أخوها أو زوجها مدخن
43- أحب أسافر > أصلا مين اللي ما يحب السفر؟! .. ولما أسافر أحب أتعب ، ما أحس بالسفر إلا لما أتعب
44- دائماً يجيني تخيل إني لما بولد بموت ، و أقعد أفكر إني أكتب رسالة لبنتي أو ولدي اللي بجيبهم
45- قلبي جداً ضضعيف ما أتحمل أشوف مناظر تعور القلب أبداً لأني يظل أحلم فيها كل ليلة
46- مستحيل أنام و أنا لابسه خاتم و إلا سلسال و إلا حلق
47- ما أحب علك النعناع أبداً، أحس النعناع مرتبط بمعجون الأسنان، مره أكلت كب كيك الشوكولاته بكريمة النعناع بغيت أنهار لأني حسيت إني آكل معجون أسنان
48- أحب أمي و أبوي و خواتي و عيالهم و أخوي و كل عائلتي ، أششششتاق لهم كثير و إذا رحت مكان حلو تجيني الغبنة لأن ودي يكونوا معي و يشوفونه
49-  تزوجت و أنا عمري 16 سنة ، بعد ما خلصت أول ثانوي
50- ممتنة جداً لله لكل العطايا و على كل شي في حياتي ، شكراً لله و الحمد لله عدد خلقه ورضا نفسه وزنة عرشه ومداد كلماته

هففف ، و أخيراً خلصت
في مرحلة من المراحل حسيت أن الأشياء اللي أعرفها عن نفسي خلصوا
بس استمتعت و أنا أكتبهم

و بسوي تاق لـ فاتن الجميلة، خبطة و أفكار اذا يسمح لهم وضع مدوناتهم، حصة، سارا عبدالرحمن، رندا الفنانة و طيبة المبدعة =))
و الله ودي اسوي لكم تاق كلكم على ما يبدو 
بس نكتفي بذولا ، و اتمنى تفاعلكم الجميل ❤