يوميات حامل | الثُلث الثانِي

السسلام عليكم و رحمة الله

سسعيدة فيكم جميعاً ، سعيدة بلايكاتكم و تعليقاتكم على البوست اللي قبل
و ان شاء الله مسستمرة معكم

لما تدخلين الرابع تاخذين نفس طويل شوي
فرصة الإجهاض تكون قليلة بإذن الله
عشان كذا تشوف ناس كثير ما تعلم الا بالشهر الرابع لأن الحمل يثبت أكثر ع قولتهم
أول لأن الحمل بكل بساطة بدا يبان

السبب الثاني اللي يخليك تاخذي نفس طويل
هو أن الشهور الوسطى هي أخف الشهور بالحمل
الغثيان الصباحي خف و ما بعد تصيري بطة
فَـ حاولي تستمتعي فيها قد ما تقدري

و فيه حاجه حلوه نسيت أقول عنها بالتدوينة اللي قبل
بالأشهر الأولى طلبت لي جورنال للحمل
مره حلوه و كيوت و للناس الفاضيه
فيها صفحات فاضيه عشان تكتبي فيها اللي ودك فيه
فيها صفحات عشان تلزقي صور الإلتراساوند
و فيه صفحات أفكارها حلوه مثل رسالة للطفل ، للأشياء اللي اشتهيتها ، التاريخ اللي علمتي فيه أهلك و كثير
و فيه أشكال كثيرة منهم بس أنا هذا اللي طلبته

أو ممكن تكوني مبدعة أكثر و تسوي سكراب بوكينق و انتي اللي تقصي و تلزقي
و مجال الإبداع فيه كبير

في الشهر الخامس جمانا حصلت أول هدية
في تجماعاتنا أنا و بنات الغربة وحدة من البنات وزعت هدايا ع الأطفال

 و ما نست جمانا

طيب وش الهديه ؟ جزمة بنوتيه نقطة
مررره كيووت
عطتني اياه و قالت جبته لك عشان اتوقع انك بتجيبين بنت
و ترا هي مع وحده ثانيه كانوا الوحيدين اللي متوقعين بنت
أما الباقي أغلبهم يقول ولد
و حتى اللي بالسعودية واجد قالوا شكلك بتجيبين ولد
أمّا أم زوجي كانت تقول ان شاء الله بتجيبين بنت لأن كل عيالي بكّروا ببنت
و فعلاً لما دققت ، كل بناتها و كل أولادها أول طفل معهم بنت
أما أنا بصراحة ما كان عندي احسساس أبد يعني لا بنت و لا ولد

ذكرت موعد السونار يوم رحنا
أول ما بدت، سألتني قالت تبون تعرفون جنس الجنين ؟
و قلت لها لا من ورا قلبي
بس الاتفاق اتفاق > توهقت

طيب بقول لكم شي بس ما تضحكون
تذكرون يوم قلت لكم اني كنت أتابع فلوقرز حوامل واجد ع اليوتيوب
تحمست معهم و سويت فيديو و قعدت أسولف فيه
ضحكتوا ! طيب معليه
لا و ابشركم يالأخير قلت و ان شاء الله بحاول أصور كل أسبوع
بس وش اسوي مره تأثرت معهم و قلت بخلي بنتي تشوفه

عاد للحين من سجلته و انا ما شفته ، أخاف أشوفه ثم أتهور و أحذفه

من الأشياء اللي تترقبيها من تحملين ، هي الحركة
طبعاً أنا قبل ما أحمل مو جايه اتقبل الفكررة
و أحسها تخوف أن كائن حي يتحرك بداخلك !
حتى يوم أسولف مع بنت خالتي قلت لها ما خفتي ؟ قالت بالعكس ممتع

أول مره حسيت بحركة كنت واقفة و أغسل المواعين
و فعلاً كان شعور غريب و يخليك غصب تستوعبي انك حامل حقيقي
و طبعاً كل ما تمشي الأسابيع كل ما تقوى الحركة و تبدي تفرقي بين الشقلبة و الرفسة

و بعدها قعدت أتلفلف بالأسواق عشان الهدايا عشان قرب موعد رحلتنا للسعودية
و ما كنت ناوية أشتري شي للبيبي
بس شفت وَنزي عليها زرافه كيوت
و حسيت أنها محايدة فـ أخذتها و كانت هذي أول قطعة ملابس أشتريها للبيبي

و بديت أجهز لنزلة السسعودية و كنت مبسسوطة بشكل
بالذات ان هذي أول مرا أقعد كذا فترة طويلة بأستراليا
و الششوق واصل ألف
و فعلا ركبنا الطيارة و الحلو اننا وقفنا ترانزيت كذا يوم في سنغافورة
يعني الرحلة ما كانت طوويلة علي لانها انقسمت لنصين

وقفنا بسنغافورة كذا يوم ريحنا فيها و انبسطنا
و مششيت فيها لين قلت آممين
و أحيان الجو الاستوائي يصدمنا بهطول أمطار غزبرة
و الرطوبة كان لها دور كبير
بس بشكل عام كانت رحلة لطيفة

و بعدها مسكنا خط السعودية و انا أعد الساعات عشان أشوف أهلي
و صحيح هذي مو أول مرة أغيب عنهم و أرجع
بس دائمماً لحظات اللقاء مميزة
مرره ما أنسى اللحظة اللي حضنت فيها أمي و بست راس أبوي و شفت وجيه أخواني
ربي يسسعد كل المغتربين بشوفة آهاليهم

و بالسعودية ما ششاء الله صادف أنا حامل مع ثلاثه من زوجات اخوان زوجي
ثنتين يولدون قبلي و الثالثه ما تبي تعلم
بس مره كان شكلنا تحفه لما نتجمع و نجلس جنب بعض
حتى اذكر مره كذا خلصنا الغدا و قعدنا انا و اياهم الا تجي وحده من خوات زوجي
يوم شافتنا قالت ودي اجلس معكم بس أخاف تعدوني

و بالسعودية رحت لـ أول تسوق للبيبي
مره شعور لطيف و انتي تطالعي الملابس الصغنونة اللي حولك و تختارين
بس يوم جيت أحاسب حسيت بالملل ، كل شي أبيض خخ
بس أصلاً الأطفال أحلى بالأبيض
يعني يمكن أكثر شي قهرني اني ما أعرف جنس الجنين هو التجهيز
يعني شريت أشياء حلوه بس مو كيوت
عشان كذا جهزت بس للأيام الأولى و بعدها ابدأ اشتري

لا و اللي كان يقهرني أكثر ، لما أحد يسألني وش بتجيبين
و أقولهم مدري تجيني ذيك النظرات انو خفي علينا يا اللي ما تبين تقولين
وأقعد أشرح لهم القصة و ان هذا اقتراح زوجي و اتفقنا و كذا
لا و بعضهم ما يصدق بعد ، ما تبي تصدق براحتك
يعني اقدر اختصرها و أقول عرفت بس ما ابي أقول

و طبعاً كان جدولنا مرره زحمه
مناسبات و طلعات و عزيممات
و ططارت بلمح البصر
و جا اليوم اللي أسلم فيه على أعلي و كنت وقتها بآخر يوم بالسادس
و بعدها مسكنا خط المطار و بالطريق كنت أكلم زوجة أخو زوجي أبارك لها على مولودها الجديد

و بكذا خلصت الثلث الثاني و أكيد الشهر السادس كان أسرع شهر مر علي
لأني كنت بين أهلي و صديقاتي
و بنفس الوقت كان صعب جداً ، كان لازم آخذ فيه قرار الولادة
وين أولد ، السعودية و إلا استراليا
و كان فيه ضغوطات شويه ، لكن الحمدلله كلها عدت على خير

و أتمنى انكم انبسسطتوا بهذا الجزء مثل اللي قبله
ابداً ما توقعت حماسسكم معي ربي يسعدككم
توقعتكم ما رح تكونوا مهتمين بهالسسوالف

و شوفوا لي حل صراحة) 
الموضوع يقعد بالدرافت شهر عشان أرتبه و اضبطه و أبيه بيرفكت
وبالأخير ازهق منه و اكتب سريع
( يعني لا أنا اللي ضبطته و لا اللي نشرته بسرعة