يوميات حامل | الثُلث الثالِث و الأخير

تححية طيبة

 هذي التدوينة إهداء لـ بشرى و فاتن و أموّن و ريما
تعليقاتهم جداً أسعدتني على هذي السلسلة و حمستني أكثر 
و لكل اللي علقوا و قروا التدوينات اللي قبل و كانوا ينتظروا هذي التدوينة 

فـ خل أبدأ معكم و بحاول أختصر قد ما أقدر

طبعاً مثل ما قلت لكم إن الثلث الثاني انتهى مع انتهاء آخر يوم لي في السعودية
و بديت الثلث الثالث مع بداية رحلة العودة إلى استراليا
و هذه الرحلة كانت من أصعب رحلات العودة
سواء جسدياً أو نفسياً
الرحلة كانت متواصلة و قعدتي ع الكرسي كانت كثيرة بس النفسية هي اللي تعبتني أكثر
ما أدري ليش هذي المرة كنت متأزمة كثير
كنت في حالة نفسية سيئة ، كانت دايم أبكي
يعني عادي جداً إننا نسولف و نضحك و بنفس الوقت تنزل الدمعة من عيني
و إذا كلمت أحد من أهلي ، بمجرد ما أكلمهم أبكي و ما أقدر أمسك نفسي
ما ادري هو عشان اني حامل و الا عشاني قعدت شوي بالسعودبة و ما أمداني أشبع من أهلي أو عشان اني كنت حاطه ببالي أني بولد عن أمي
أو يمكن الثلاثة أسسباب مع بعض !!

بس الحمدلله عديت هذي المرحله و استسلمت للأمر الواقع
و رجعت أضحك و أسولف مثل أول ، بس دائماً الأيام الأولى صعبة

بعد ما وصلنا بفترة
استقبلنا السرير “هدية” من احد الاصدقاء
و ركبناه مع بعض و صار الموضوع جد بالذات لما امر من عند الغرفة و اشوفه موجود
صرنا من جد ننتظر الولادة
و من زود الحماس قعدت احوس بالنت اشوف أفكار لتصوير النيوبورن

و طبعاً أغلب الحوامل يمكن لاحظوا ان بالشهر السابع
تحسين بحركات الطفل أكثر
رفسات و بوكسات و شقلبات
يعني نششاط زايد و هذا طبعاً لأنه صار أكبر من قبل و المكان بعده ما ضاق عليه
و ممكن تحسين بالطفل لما يجيه أبو فوق أو حازوقة
بس كل ما تتقدمين كل بالشهور كل ما تقل الحركة ، لأن الطفل بكبر و المكان يضيق عليه 

لو احد يسألني وش اسوأ شي بالحمل
ما راح أقول الثقل أو آلام الظهر او هذي الأشياء
رح أقول بدوون منازع
الحموضة و الحرقان
كان جداً قاتل ، و جربت كككل شي زبادي ، خيار ، حليب ، قشطة ، بسكوت ، كككل شي
و أصلا انا ما آكل مقليات و لا اشياء حارة و لا آكل قبل النوم
يعني جد كان صعب و ما ريحني الا الشراب اللي عطتني اياه الدكتورة لما قلت لها
في البداية كان صعب جداً قبل ما أنام او لما انسدح بعد صلاة الفجر
بعدين تطورت الحالة و صرت اقعد من الحرقان ، كان شي أليم
و صراحة انا اقدر الأمهات اللي يعانون منه من بداية حملهم
أنا بالشهور الأخيرة و ما تحملت ، كيف هم 

يعني من زود ما انه صعب خلاني اراجع نفسي في عدد الأطفال اللي ابيهم
و قعدت احسب انو لو ابي ثلاثة أطفال ، نضرب تسعة في ثلاثة
يعني سنة و نص من حياتي بكون فيها حامل !!
طيب لو ابي خمسة ، ما يقارب اربع سنوات من عمري !
هههههههه هذي تفاكير الليل
بس الحمدلله عدّى كل شي على خير

و من اسوأ الأشياء اللي صادفتني بالترايمستر الأخير ، الحـرررر
حر استراليا قاااتل
و بعض البيوت ما يحطون فيها مكيفات ابد ع قولتهم الصيف كلها كم شهر
بس اشوى بيتنا كان فيه مكيف بالصالة
و ما يحتاج اقول لكم اننا انتقلنا للعيش و الأكل و النوم بالصالة
و الشي الاسوأ اللي صار لنا بعدين
إن المكيف اختررب
و يمكن قعدنا شهر بدون مكيف
حالتنا ججججداً صعبة
و الجو ما يرحححم ، كنَا نروح المول عشان نتبرد
لين ما اخيراً تصلح المكيف

قبل ما أولد بفترة
بديت اسوي تصاميم لـ إعلان الولادة
طبعاً سويت للجنسين بما اني ما أعرف وش رح أجيب
و للجنس الواحد سويت أكثر من تصميم خخخ

فـ بحط لكم اللي سويته لجمون و قولوا لي وش أكثر واحد تفضلونه
طبعاً كلهم نفس الكلام بس الديزاين يختلف

بديت أرتب ملابسها و أغراضها بالأرفف 
فرشت سريرها و نظفت البيت 
و كنت دايم أحاتي كيف رح أولد ، الفجر ؟ بنص الليل؟ و احنا طالعين مشوار ؟
الطريق رح يكون زحمة ؟ رح أكون مستعدة و الا لا ؟ 
كيف أعرف إنها ولادة وإلا لا ؟ أدق على مين طيب ؟
كانت هواجيس الولادة كثيررة بشكل بس كنت أحاول أخلي كل شي بوقته

في أحد مواعيدي ع بداية الشهر الثامن
كانت الدكتورة تشيك بالسونار نبضات القلب و هذي الاشياء
قالت لي رح احولك تسوي التراساوند لأن احس حجم بطن الطفل صغير
قلت لها شلون صغير؟ قالت لا، لا تخافي
يمكن مو صحيح لان تشوفي جهازي قد ايش قديم بس روحي عشان نتأكد

و لأن اذا صار صغير رح نضطر نولدك بدري
و فعلاً رحنا بالموعد و اخذوا القياسات
قالت مو بطن البيبي صغير، البيبي بكبره صغير بس بعده  بالقياسات الطبيعية
بس رح نسوي لك سونار كل اسبوعين عشان نتأكد انه ينمو

وفعلاً كل اسبوعين كنا نسوي سونار عشان يشوفوا تطور النمو و يسووا له تراك بس كان النمو جداً بطيء
لين ما رحت موعدي الثاني في شهري التاسع 
قالت لي الدكتورة إن مقاسات أخر سونار سويته نفس مقاسات السونار اللي قبله و إنها بدت تخاف 
بس بنفس الوقت مبسوطة ان دخلت التاسع و كل شي مستقر 
 و عطتني تحويلة كالعادة عشان اروح اشيك على نمو الطفل

و فعلاً ، رحت في اليوم اللي بعده على طول 
و الطفل ما تغيرت مقاساته ابداً ، هذا معناه ان الطفل ما نمى شي من دخلت التاسع 
مع انه المفروض ان زيادة وزنه و نموه تكون بالدبل في الشهر التاسع 
هذا معناته انها مو قاعدة تستفيد من المشيمة شي !

ارسلت النتايج للدكتورة 
و على طول كلمتني و قالت انها بدت تخاف ، و قالت ان شاء الله خلال هالاسبوع تولدين 
عشان لو كان الطفل برا احسن من لما يكون داخل 
لان برا نقدر نتحكم بالوضع لو صار شي او الطفل احتاج شي 
و إذا تأخرتي رح نضطر نولدك 

كنت كل ليلة أنام على أمل اني اقعد و انا أحس بآلام الولادة 
الأيام تمشي و أنا أبيها ، أبي أحملها و أحضنها مع اني عارفة اني بشتاق لها و هي في بطني 
كنت أبيها تنولد بالسلامة ، أبي أشوفها و أبيها تكبر قدام عيوني 

إلى أن جا يوم الجمعة 
الرابع من جمادى الثاني سنة ١٤٣٥ 

اليوم اللي غيّر حياتي ، اليوم اللي صرت فيه أم 

اليوم اللي ان شاء الله رح أكتب عنه تدوينة منفصلة 
أتمنى إنكم استمتعتوا بهذي التدوينة 
أحب أشوف تعليقاتكم ، و لا تنسوا تخبروني أي أعلان أعجبكم أكثر 

كُل الحب