إنجازات و أحداث عام ٢٠١٤

مصدر الصورة *

! كيف السنوات تمشي بسرعة كذا
بس احس بنفس الوقت ان سنة ٢٠١٤ كانت طوويلة
طويلة بالنسبة للأحداث اللي صارت فيها
أنا قلت ان سنة ٢٠١٣ كانت سنة اكتشافي لنفسي
بس ٢٠١٤ كانت سنة التغيرات الكبيرة

و أهم تغير بهذي السنة و أجملهم اني صرت أم
صرت أم لطفلة صغنونة أهتم فيها و أفكر فيها قبل ما أفكر بنفسي
و أعتقد ان هذا تغير كبييير في حياة كل بنت\زوجة
وتغيرات كبيرة ثانية مثل مغادرتي أستراليا و دخولي للجامعة و العودة لحياة الدراسة

بس الحين خلونا نمشي حبة حبة بأهم الأشياء اللي صارت بحياتي خلال السنة الماضية

استقبلت السنة الجديدة بأول لاب توب لي بالحياة –
اشتريت بالبداية لاب توب من اتش بي و كنت سعيدة فيه و بعدين صارت مشكلة في الأبديت حقهم
و رجعته و أخذت بدله ماك بوك اللي من أمنياتي في الحياة

رجعت ارسم سكيتشز سريعة بس عشان ترجع يدي خفيفة ع الرسم –

 طلعت نتايج اختبار القدرات و التحصيلي – كانت حلوة الحمدلله –

و أخخخيراً زرت مزرعة الفراولة و التوت و قطفته و أكلته فررش –
(بحاول أنزل تدوينة عن هذي المزارع قريباً)

بدأت بممارسة اليوقا بما انها احدى الرياضات المفضلة للحوامل –
و وقعت بغرامها من جد ، للآن أمارسها و بيني و بينها علاقة عشق

سويت مونتاج  و رفعت مقطع زيارتنا لتزمانيا ع اليوتيوب –
و تلقون رابط الفيديو هنا

رجعت أخيط مثل أمي ، و خيطت دبدوب و أنا حامل لجمانا عشان تصير أول لعبة لها من صنع أيادي –

زرنا سيدني الأسترالية  و نفس الشي سويت للرحلة فيديو قصير و رفعته ع اليوتيوب –
و تلقون الفيديو هنا

صرت أُم لـأجمل طفلة في الدنيا و أحلى قطعة من الجنة –

أول ابتسامة و أول ضحكة و أول كلمة و أول سن و أول خطوة لجمان –

جمان تقلبت و زحفت و جلست و حبت و وقفت في هذي السنة –

عشت تجربة التسجيل في الجامعات و حوستها –
و ما خليت جامعة ما سجلت فيها بعد ، كل هذا عشان أضمن لي مقعد بجامعة ع الأقل

صورت جُمان فيديو كثييير و سويت مونتاج لكل شهر فيديو خاص –
بس للحين ما خلصت فيديوهات الأشهر الأخيرة
و ناوية لما تكمل سنة أسوي مونتاج كامل لأهم اللحظات خلال سنتها الأولى

صممت شعار لإحدى الأقرباء و حبيت سالفة تصميم الشعارات و ودي أتعمق بالموضوع أكثر –

تذكرون العام يوم سويت قبعة لي بالصوف ؟ –
السنة هذي سويت لجمان القلب قبعة بالكروشيه

تقريباً بدأت بكتابة ثلاث قصائد عن جمانا و للحين مالهم نهاية ، ان شاء الله اكملهم السنة هذي –

في منتصف العام لمينا أغراضنا و ودعت أستراليا –
ودعتها بعد ما قضيت فيها ما يقارب الثلاث سنوات اللي كانت مليانة تجارب و مليانة أحداث و ذكريات

قضيت أول رمضان و أول عيد بالسعودية و أنا متزوجة –

تحققت احدى أمنياتي المئة و دخلت الجامعة بعد معاناة طويلة مع الدراسة –

ايوا صرت سعودية و أخيراً و طلعت لي بطاقة أحوال و صورتي موب شينة –

خرمنا آذان جُمانا برمضان قبل العيد بكم يوم –

صار معنا حفيد جديد في العائلة ، عبدالمحسن اللطيف –

خلال هالسنة حضرت ما يقارب الثلاث دورات اللي تكون قصيرة بواقع ساعتين أو أربع ساعات –
و ممرة انبسطت فيهم و من التنوع بعد

شاركت بفعالية الشريط الوردي البشري في شهر اكتوبر تفاعلاً مع اليوم العالمي لـ سرطان الثدي –

 شاركت بمعرض في الجامعة بلوحة اسمها ” ميلاد “ تتعلق بجمون –

قسم اللغة الانجليزية نظم مجموعة من المسابقات و اشتركت في ثلاث و فزت في ثنتين  –
مسابقة القصة القصيرة و مسابقة بِع فكرتك و هي أن تأتي بفكرة تجارية إبداعية بسيطة  و تعرضها للجنة الحكم
و كانت هذة المسابقة بالمشاركة مع الصديقة نورة منصور

تطورت شوي من ناحية الأكل و بديت أجرب حاجات جديدة –
يعني ما شطحت واجد بس بديت اجرب أشياء كثير جديدة مثل الفواكه المجففة ! توي أجربها السنة هذي

أتممت هدفي بالقراءة وقرأت ٤٠ كتاب بالضبط –

نشرت ١٥ تدوينة و ان شاء الله أنشر أكثر من هذا العدد بهذي السنة –

أتممت حوالي ٥ أهداف من المئة حاجة اللي أبي أسويهم بحياتي –
و ممكن تشوفون أهدافي هنا و ان شاء الله قريباً أجددها

و أخيراً أنهيت السنة الماضية و أنا أذاكر للاختبار النهائي للغة الإنجليزية
و على أمل أن تكون سنة ٢٠١٥ مليانة إنجاز و مليناة تحقيق أهداف و مليانة طاعات

السنة هذي فعلياً رتبت أفكاري و كتبت وش أبي أسوي من كل جانب في حياتي
و سويت لي خطة شهرية بس عشان تذكرني بالأشياء اللي ابي اسويها
و كتبت لي عادتين ابي اوقف عنها و منها اني أترك عادة وضع جوالي سايلنت و الحمدلله للحين ماشية بالسليم
ناوية أكتب رسالة لنفسي بعد ، عشان أقراها بداية السنة الجديدة

و آخر شي ، أتمنى من كل وحدة تقرأ هالتدوينة
تسيّر على صفحة اترك شيئاً
و تكتب لي تعليقها ع المدونة بشكل عام
و ايش التدوينات اللي تحب تشوفها هنا أو اقتراحات أو أي شي
المساحة لكم

و شاكرة لكم تواجدكم الجمميل