سلام الله و رحمته عليكم أينما كنتم
صباح و مساء الفًل
هنا ، حابّة أوجّه رسالة إلى كل أم تدرس و كل أم تعمل و تشتغل
و أي شخص بالعالم له صلة فيهم
كل زوجة أو حامل ، لازم فكرت بهذا الموضوع
لمّا أجيب طفل ، أكمل دراسة أو أوقف ؟
أكمل عملي بالوظيفة أو أطلع ؟
و مو بالضرورة تكون البنت متزوجة عشان تفكر بهذا الموضوع
أعرف وحدة جلست معها تقول أنا لما أتزوج رح أطلع من وظيفتي رغم انها مو مخطوبة حتى
بالنسبة لي ، كان الموضوع مختلف شوي
كان إكمال الدراسة -ع الأقل بكالوريوس- حاجة من الحتميات و المسلمات لدرجة إنّي ما فكرت بهالموضوع
متى فكرت طيب ؟ لما بديت الدراسة
متأخر ، صح ؟
لما بديت أعيش ضغط الدراسة و التفكير بجًمان
كثير ما جاني هالتفكير ، أنه ايش بيضرني لو أنا قاعدة بالبيت و مبسوطة مع جمانا
و ما يشغل راسي شي و ما أحاتي اختبار أو واجب
و دائماً أحاول اشيل هالفكرة من راسي بدون ما أفكر فيها زين
متى اقتنعت باللي قاعدة أسويه ؟
متى اقتنعت أن الأم اللي تدرس مو غلط ؟
لمّا عرفت ليش أنا أدرس و أيش هدفي ، وهل فعلاً وقتي اللي آخذه بالجامعة او الدراسة يعتبر تقصير بحق بنتي و الا لا
لحظتها ، عرفت أن اللي اسويه عين الصواب
و من بعدها ما عاد يهمني أو يزعلني لمّا وحدة تلوموني ليش أخلّي جمون و أروح الجامعة
لأني أعرف أنك أنتٍ كأم عاملة أو طالبة ، قاعدة تسوي حاجة عظيممة جداً
و عندك مسؤولية كبيرة جداً بالإضافة إلى مسؤولياتك الكثيرة
اللي تقتضي الاهتمام بالزوج و الأطفال و المنزل
أنتٍ قاعدة توصلي رسالة للكل، إن المرأه قادرة على قهر الصٍعاب
تقدر أنها تؤدي وظيفتين بنفس الوقت ، مع صعوبتهما
أنتِ أبداً مو مقصرة في حق بنتك أو ولدك
أنتِ لما تودين طفلك للحضانة ، أنتٍ قاعدة تساعدينه يبني مهارات اجتماعية مهمة لنمو طفلك و تطويره
و لما تتركينه عند أمك ، أنتِ خليتيه عند وحدة تهتم فيه و تخاف عليه أكثر منك حتى
و أنتِ مو رايحة تدرسي أو تشتغلي عشان نفسك بس
أنت تسوّي اللي تسويه عشان نفسك و عشان طفلك
أنتِ تعطيه فكرة أنّ المفروض الواحد ما يستغني عن أحلامه
مهما بدى التحقيق صعب
انت تعطيه نموذج مميز للطموح
أنتِ قاعدة تدرسي أو تشتغلي عشان تأمنّي مستقبل أفضل لطفلك
لا تستهيني باللي قاعدة تسويه ، لأنه شي كبير
أبداً لا تحسي بالذنب ، لأنك مو قاعدة ٢٤ ساعة مع طفلك
كثير أمهات قاعدين مع أطفالهم طول الوقت ، لكنهم من أسوأ الأمهات
العبرة مو بعدد الساعات اللي تقضيها معهم
العبرة بكيف تقضينه معهم
دائماً هم على بالك
و دائماً تفكري كيف تقضي الوقت معهم و تعوضيهم عن انشغالك
علاقتك معهم مميزة جداً
مهما انشغلتي عنهم ، تعلقهم فيك رهيب
و اهتمامهم فيك عجيب
ما تتخيلوا قد ايش ارتاح لمّا أشوف وجه جمون لمّا تشوفني
كيف تبتسم و كيف تضحك
كيف لما أعطيها شي تاكله تجي تأكلني و لما أعطيها كاس عصير تشربنّي
و أنتِ عزيزتي القارئة ، لو تعرفي أم تدرس أو تشتغل
لا تحكمي عليها بأنها مقصرة مع أطفالها و أنها ما ترعاهم حق الرعاية
بمجرد أنها تتركهم فترة معينة من الزمن
و لو جتك تشتكي لك من الضغط و التعب ، لا تقولي لها انتِ اللي جبتيه لنفسك
قدّري المجهود اللي قاعدة تبذله و شجعيها و خبريها انها قوية و انها تقدر تواجه هذي الصعوبات
و ادعي لها بالتساهيل و التيسير
.
.
رسالة سريعة ، أتمنى أنّي وُفقت فيها
و تكون دافع و تشجيع لكل أم قاعدة تتعب في دراستها أو عملها
و يللا ورونا همّتكم يا الأمهات الطالبات أو العاملات
قاعدة أفكر أكتب موضوع عن الموازنة بين الأمومة و الدراسة بالخصوص
بس لازم أشوف له جمهور
– و على فكرة ، فيه قائمة الأصدقاء توشوفها على يمين المدونة
شاركوا فيها عشان لو حابين يوصلكم كل جديد
زينب الحجي 
آه حبيبتي هذا الموضوع المؤلم!
اذا اشتغلت الوحدة قالو مقصرة مع بزورتها واذا قعدت في البيت قالو ضيعت مستقبلها
في كل الحالات ما نسلم من كلام الناس، عن نفسي الى الآن ما اشتغلت والحق اني مبسوطة بكل لحظة مع اطفالي واعرف كل حركة من حركاتهم ايش تعني وانبسط اذا قالو كلام محد يقدر يفهمو غيري حتى زوجي ما يفهمو ومرتاحة على قولك انو ما اشيل هم واجب وقلق الدوام
لكن دايماً تبقى مشكلة اني لازم اطور نفسي في شي احبه، لازم اكون انا أنا اللي كنت اتخيلها في احلامي، وهذا الموضوع مرهق للعقل حقيقة
نفسيتي الى الآن ما استقرت رغباتي القديمة كلها اختلفت واحس بالضياع فين اكمل وفين اروح
الله يسلها
موضوعك جميل كجمالك وجمال جمان 🙂
بالضبط ، لذلك على كل واحد يعمل باللي يؤمن فيه و يسعده و يريحه
و هذي العلاقة اللي تبنيها مع أطقالك صدقيني تسوى كل شي
و يرسخّ في بالهم ذكريات مهما كبروا ما ينسونها
هو المشكلة على قولة أمي ، أنكم تبون كل شي بوقت واحد
نبي نمارس الأمومة و ندرس و نطلع و ننبسط و نتمشى و نسافر و كل شي بنفس الوقت
لذلك انبسطي الآن و الدرب طويل قدامك ، و بتصيرين الشخص اللي دائماً تحلمين فيه
و عيونك الجميلة و الله يا فاتن