مفضلاتي لـ شهر جُمادى الأولى

سلام الله و رحمته عليكم أينما كنتم

كثير ما أستمتع بمواضيع المفضلات خصوصاً إذا كانت متنوعة
و بما إنّي أستمتع فيها ، قلت ليش ما أسويها و أشارككم فيها 
و شخصياً استمتعت كثير بكتابة هذي التدوينة و الحديث عن أشياء أحبها 
بس يخي كلامي كثير و أحب أسولف كثير 
لذلك أتمنى أنكم تستمتعون و تستفيدون و ما يخرّب عليكم كلامي الكثير 

و إذا ودك يوصلك إيميل كل ما نزلت تدوينة جديدة ، لا تنسي تكتبي إيميلك بالخانة اللي بالهامش تحت 
 و يشرفني تكوني من الصديقات الرائعات المنضمات لهذي القائمة

و بالمناسبة ، حقوق الصورة التي بالأعلى تعود لـ تقويم متجر أيار الجميل
سعيدة بوجود متاجر مثل هذا الإبداع
و هُنا موقعهم | انستقرام | تمبلر | تويتر 

و بسسم الله نبدأ 

التطبيقات

Lumosity

البرنامج هذا جبّار ، أتوقع ما بقى أحد بحياتي إلا قلت له يحمله

البرنامج هذا عبارة عن مجموعة كبيرة من الألعاب المصممة من قبل علماء متخصصين
و كل لعبة تحاول تحفز مهارة أو جزء من أجزاء الدماغ الخمسة اللي هم محددينها
الذاكرة ، السرعة ، الإنتباه ، حل المشاكل ، المرونة
البرنامج مصمم انه كل يوم يفتح لك خمسة ألعاب جديدة ، كل لعبة تحفز مهارة 
طبعاً مع الأيام بتبدأ تتكرر معك بعض الألعاب و يبدا يحدد مستواك في كل مهارة 
و بما إن عندي النسخة المجانية من التطبيق ، فهو يفتح لك ثلاث ألعاب بس ، بس ما احسها مشكلة 
و عدد الألعاب اللي فتحها لي مهول ، حتى أفكر وش كمية الألعاب اللي ممكن بحصلها إذا شريت النسخة المدفوعة 
البرنامج مررة مررة معجبني ، و صرت أعتبره كنه برنامج تمارين لعقلي 
يومياً أفتحه و أتدرب ، وكل يوم جديد ، ألعاب غير

Doulingo

هذا التطبيق مفيد جداً للي ودهم يتعلموا لغة جديدة ، فيه عدد كبير من اللغات ، مع لغات مختلفة للبرنامج
حملت البرنامح هذا من زمممان في بداية انطلاقه و ما عجبني
و لكن مع قراري الجديد و الصارم لتعلم لغة جديدة
جربت كل شي من جديد ، و بشكل عجيب
عجبني هذا البرنامج و ححبيته ، حاجة متعوب عليها
طريقة البرنامج و الرسومات و الألوان
تنوع الأساليب للتعلم و التذكير اليومي
باختصار ، يسستاهل التحميل و التعلّم منه
و يكفي انه برنامج رهيب و مع ذلك مجاني يا جماعة !

خلود إبراهيم

هالبنت يا جماعة رهيييبة ، الحمدلله انّي سمعت التوصية و أضفتها بالسناب
تعمل دروس عن الألوان المائية ، شغلها مرتب و يفتح النفس
هذا غير عن رسمها اللطيف و التصوير المميز
و الدروس متسلسلة و وافية و ما تقصر بشي لو سألتيها و طلبتي منها طريقة شي
أي أحد يبي يتعلم على الألوان المائية و أساسياتها لازم لازم يضيفها

انستقرام | يوتيوب | بيهانس

نورة السلمان

أحب الخياطة بس مالي فيها كثير ، مشاريع تنعد ع اليد اللي خيطتهم
و أتابع اللطيفة نورة السلمان على الإنستقرام و السناب
و انبسطت كثير يوم صارت تسوي فيديوهات و تنزلها ع اليوتيوب
ما شاء الله عليها تنزل باستمرار و مقاطعها تفتح النفس ، متنوعة بين الأعمال اليدوية بس أبرز شي الخياطة
مبسوطين إن فيه قنوات عربية باليوتيوب تقدم هالمحتوى اللطيف

انستقرام | يوتيوب

و شخصياً حابه هالبنتين و أقدرهم جداً
يكفي انهم يوفروا لك المعلومات و الدروس بشكل مرتب و جميل و مجاناً
ربي يسعدهم و يوفقهم و ينفع بهم 

أطباق النخبة لـ أمل يحيى الجهني

شريت هذي المجموعة من فترة طويلة ، و من قبل ما أجرب أي وصفة فيه ، معجبتني
تنوع الوصفات و كيف كل طبق له صورة و بعضهم بالخطوات بعد
و الترتيب الرهيب ، حاطة المنتجات و الأجهزة بداية كل كتاب ، و بآخر الكتاب أنواع الصوصات و طرقها
و مقسم إلى تقسيمات أساسية كثيرة ، مثل أطباق الدجاج ، الرز ، الحلويات الشرقية ، حلويات الكافيهات ، أطباق الدايت و أكثر و أكثر
و يوم صار عندي مطبخ ، افتح الكتاب احتار وش اسوي من جمال الوصفات و اقفله
و بالأخير قررت ان كل أسبوع أجرب طبق جديد و حلا جديد
و كل شي يضبط ما شاء الله 
و بالمختصر المفيد : هالكاتبين يغنون عن المئات من كتب الطبخ

صندوق الغداء

و على طاري الأكل و الوجبات و الحركات
مع دخول جمان للحضانة و تجهيزي لأكلها ، ظليت أبحث كثير عن “صندوق غداء أحلامي” كنت ابيه بحجم معين و تقسيم معين 
 و رحت محلات كثير و ما شفت اللي ابيه
و بهذي الفترة كنت أحوس بالأمازون و اشوف الأشكال الموجودة و الأسعار و كذا ، لأني شايلة فكرة الطلب من راسي
و ذات يوم ، شفت صندوق غداء أحلامي ! و بالدانوب ! و نفسه هو اللي معجبني بالأمازون
و شريته على طول ، واحد لي و واحد أصغر لجمان 
و كثير يسألوني من وين شريته ، حتى المعلمات بالحضانة يقولوا جتهم كم أم تسألهم عنه ، فالموضوع يستحق المشاركة

و فيه ألوان و أحجام و تقسيمات كثير ممكن تشوفونها بالأمازون هنا

سلسلة قصص جُمان

هذي السلسلة الجميلة ، من مفضلاتنا لهذا الشهر
مع اننا شارينهم من زمان ، بس هالشهر خصوصاً ، حسيت جمان حابتهم بقوة
كل ما أقولها تجيب قصة نقراها تجيب لي وحدة من هالسلسلة
و اذا تبون تعرفون أكثر عن هالسلسلة ، ، تكلمت عنهم في تدوينة سابقة هُنا

Ted Talks

وهل يخفى القمر ؟ وقفت عنه فترة طوويلة و رجعت له هالشهر
مرة حلو و ملهم ، اشغل لي مقاطع منه غالباً لو كنت اشتغل 
  مثلاً أغسل المواعين أو أرتب الملابس 

” و إذا عندكم مقاطع تحبونها أو تنصحون فيها ما بنقول لا ، عطونا اساميهم أو روابطهم “

كورساتي

هذا الموقع رهييب ، و كمية الكورسات اللي فيه كثيرة و متنوعة و مفيدة جداً للتعلم الذاتي 
ابحث عن اي شي تبيه و بتلقاه بهالموقع 
يستاهل الإطّلاع و الله 
و أكثر شي معجبني فيهم شعارهم ” تعلم فليس المرء يولد عالماً ” 
هِنا الموقع ، و أتمنى لكم تعلّم ممتع 

Ketab_n قناة
على التليقرام

أي أحد يقرأ كتب إلكترونية ، أكيد يعرف هالحساب 
أحسن شخص يرفع لنا كتب إلكترونية بدقة حلوة و شغل مرتب و تنوع كبير في الكتب
تنقلت مع هالحساب ، من موقعهم إلى حسابهم في تويتر إلى قناتهم في التليقرام
فـ إذا كنت مهتم بالقراءة الإلكترونية ، لا تقوّت قناتهم

 

الصمغ الأصفر

يمكن هذا من مفضلاتي خلال الأربع سنوات الماضية مو بس هالشهر
بس هذا الشهر قاعدة استعمله كثير ، ألزق أوراق كبيرة على الجدار عشان جمان ترسم عليها 
ألزق أوراق و عبارات تحفيزية و أشياء و قوائم ما ابي أنساها 
باختصار يلزق كل شي و نظيف لما تجين تشيلينه، لا و تقدرين تستعملين القطعة نفسها أكثر من مرة 
يعني أنا للآن حقي ما خلص نصه 

 

روج آسيا من ريميل

 

هذا باختصار الروج الجامعي المكروف 
لونه لطيف و ناعم و رايق و صباحي و كلش 
و يستاهل يفوز بأكثر روج استعملته لهذي السنة في الجامعة

 

و أخخيراً ، شكر كبير جداً جداً لكم
مدري شفيني صايرة أحبكم بزيادة ، أو انكم صايرين حليلين معي بزيادة
  لا جد ، كمية الدعم اللي أشوفها تُثلج صدري و تخليني ما أعرف ايش اقول
بس الأكيد انها تدعمني و تخليني أتحمس انزل تدوينات
 أحبكم من القلب ،  و تجاهلوا كم مرة قلت رهيب بهالتدوينة ، بس حقيقي أنتم الرهيبين