كيف قللّت من استخدام طفلتي للأجهزة + كيف أحذف مقاطع من اليوتيوب

  

سلام الله و رحمته عليكم أينما كُنتم

في الفترة الأخيرة أشوف كثير يشتكون من المقاطع اللي تطلع للأطفال في الإقتراحات
و صارت تجذب الأطفال بشكل مو طبيعي
و زود إن ما فيها أي فائدة تُرجى للأطفال ، فيها بعض المقاطع اللي أبداً مو صالحة لهم

و من هنا جائت رغبتي في كتابة هذه التدوينة لحلّ هذة المشكلة للي يدور عن حل

في البداية، أنا كنت سابقاً أتفاخر إن جمانا ما تطالع الجوال و لا تهتم فيه، لين جا منتصف الفصل الثاني
 و أنا بنفسي اللي علمّت جمانا ع الجوال و صرت أعطيها إياه عشان يصير عندي وقت أرتب أو أذاكر أو أنجز
 و بعدين صارت هي اللي تطلبه باستمرار و أول ما تطفش هو اللي يجي على بالها

و خلاص قررت قرار ، من تبدأ الإجازة رح أشتغل على هالموضوع و أخفف إدمانها ع الجوال
و للتوضيح ، جمانا ما تستعمل إلا جوالي فقط ، مو لاب توب أو آيباد
و تشوف من خلاله اليوتيوب أو معرض الصور فقط لا غير و مافي ولا لعبة بالجوال
 و مشكلتي الكبرى كانت مع اليوتيوب ، خصوصاً إنها بدت تشوف مقاطع سخيفة جداً و ما منها فايدة
مثل اللي يفتحون بيض كيندر أو يلعبون بالسلايم و الإم آند إمز

و في فترة اكتشفت مقاطع سبايدر مان و إلسا و الخرابيط هذي، و بالغصب أقنعتها إن هذا ييع مو حلو
و فِعلاً صارت ما تضغطهم بس كان ينرفزني إنهم لا زالوا يظهروا بصفحة الإقتراحات

و مع بِدء الإجازة الصيفية بدأت بتنفيذ الخطة لتقنين استعمالها لليوتيوب و الإلكترونيات بشكل عام
كانت الخطة إنها تستعمل الجوال وقت أقل قد ما أقدر + التسامح باستعمال الجوال بالسيارة خصوصاً في المشاوير الطويلة اللي بالليل
 لأنها بالنهار غالباً تكون مشغولة بأشياء ثانية مثل مشاهدة الجِمال و القصص و الألعاب

و بكل بساطة الخطة كانت من ثلاث خطوات

الخطوة الأولى
إني أنا أقلل استخدامي للجوال، و حتى لو بستخدمه أحاول إنها ما تشوفني
لأن مو معقول أطلب منها ما تستعمل الجوال و أنا أستعمله قدامها
و فِعلاً هالخطوة كان لها مفعول جيد جداً

الخطوة الثانية
كان لازم أُوجِد لها أنشطة بديلة تتسلى فيها وقت فراغها
و الأنشطة و الألعاب كثيرة ما شاء الله بس أغلبها كان يتضمن وجودي معها
و مثل ما ذكرت سابقاً إني أعطيها الجوال عشان أبي أنجز أشغالي
بس هالشيء يتحسن كل ما كبرت جمان ، أهليها تلوّن جنبي ، أو تركب سكة القطار
و المكعبات أكبر شاغل لها ، أطلب منها تسوي برج أو سيارة أو ترتب كل لون مع بعض و كذا يعني

الخطوة الثالثة
و هِي التي صنعت الفارق الكبير و اللي أعتقد الأغلب دخل التدوينة عشانها
و هي كيف أتحكم بمحتوى اليوتيوب اللامنتهي اللي يظهر لجمان
و هذي الخطوة جرّبت معها أشياء كثيرة لين ما وصلت للنتيجة المطلوبة

أول شي كنت أحط على الفيديوهات اللي ما أبغى جمانا تشوفها غير مهتم
و صحيح إنها ما صارت تطلع بالصفحة الرئيسية لكن لا زالت تظهر في صفحة الإقتراحات

بعدين نظفت تاريخ المشاهدات لأن الاقتراحات بشكل كبير تعتمد عليه
و شغلت فيديوهات الأطفال اللي أحسها مناسبة ورا بعض عشان تنحفظ بتاريخ المشاهدات و تصير الإقتراحات مشابهة لها
لكن المشكلة لا زالت قائمة و الفيديوهات تطلع

في هذي المرحلة بدأت بالبحث عن طُرق لحذف المقاطع أو القنوات
و للأسف اليوتيوب مو مفعّل هذي الخاصيّة مع إني شفت ناس يطالبوا فيها من ٢٠١١ تقريباً

و مِن هذا البحث طلعت بـ ثلاث نتائج قد تنفعكم

النتيجة الأولى
هنا في وصلة رهيبة تحملوها على متصفح الكروم و بعدها تقدروا تحذفوا أي قناة تبغونها و ما كأنها موجودة
لدرجة إنك حتى لو بحثتي عنها بالإسم ما رح تظهر لك بالنتائج
أعتبرها حركة فعالّة جداً جداً لكن للأسف ما تناسبني، لأن مشكلتي مع التطبيق بالجوال مو بالمتصفح على اللاب توب

النتيجة الثانية
YouTube Kids تحميل برنامج
البرنامج حلو و مرتب و في البداية جمانا ما اقتنعت فيه و ما عجبها
لكن بعدين استسلمت له لكن مع الإستخدام بدت تطلع المقاطع اللي مالها داعي أبدأ مثل فتح بيض كيندر و غيرها مثل ما ذكرت بالأعلى
 لأنها بطبيعة الحال مصنّفة كمقاطع للأطفال ، فـ حذفت البرنامج غير مأسوف عليه

لتحميله على أجهزة آبل | أجهزة الأندرويد

النتيجة الثالثة
iTubeList برنامج
 و بالنسبة لي هو البرنامج السحري و اللي سوّى لي النتيجة الفعالة و المطلوبة من بين كل ما سبق
البرنامج مو رهيب كتصميم لكنه يؤدي المطلوب
فكرته إنك تسوين قوائم تشغيل بنفسك و تضيفينها أو تضيفين قوائم تشغيل جاهزة من اليوتيوب و هذا اللي سويته أنا
ضفت لها تقريباً أربع قوائم تشغيل فقط ثنتين كرتونية و ثنتين أناشيد تعليمية
و طبعاً فيه رقم سرّي لو بضيف قائمة أو بعدل مثل التطبيق السابق
عيبه الوحيد فقط هو إني ما أقدر أضيف فيديو لحاله و لازم قائمة تشغيل لكنّي اعتدت ع الموضوع و أحسه أرتب
 و تم تقديمه لجمانا بعد إخفاء برنامج اليوتيوب الأصلي، ملف داخل ملف

مع الأيام اعتادت عليه قلّ استخدامها للجوال بشكل كبييييير لمحدودية المحتوى
و شوي شوي صارت هي اللي تطفي الجوال من نفسها بدون ما أقول لها
 و الشيء اللي مرة فخورة فيه ، إني أحياناً أعرض عليها الجوال لو كانت طفشانة بالطريق و ترفض

لذلك أنصحكم بهالبرنامج بقوووة
و أكثر شي ريحني هو إني قبل لمّا أعطيها الجوال بالسيارة كنت كل شوي أطلبها توريني وش قاعدة تشوف
بس الحين أعطيها الجوال و وااااثقة أيش اللي تشوفه جُمانا

لتحميله على أجهزة آبل | أجهزة الأندرويد

و بكذا نختم هذه التدوينة
أتمنى من كل قلبي إنها نفعتكم و أفادتكم في تحديد المحتوى لأطفالكم أو أخواتكم
 و دمتم بِكُل خير و عافية